Muokslas teig, ka muzika atsirada pirmiau už žuodi, kuo tais tiku.
Tuoks mona pažystams biški duomas muzika, nu tęp paviršutinišką kap ir daugelis iš mūsa, nu tipo darbi klausa kuokiu tai užsieni radiju, karts su konkreti muzikas sruovi, karts tiesiog indipakistanambient popuri. Aišku anuo neaplėnk tuos naujuovis, katrų dab tik spiek gaudyti, prasidaryk ekrana ir jau pėlna truoba naujuos mozikas. Nu ir aišku perklausius kalnus tuos naujuos muzikas, žiek būn ir užkabėn kuoks alboms, nu ir tadu, tas jau gaun kuoki tai personalini perklausa. O ka geriau skumbietuom tas mona draugs karts nauduo alu, vyna, žuoli ar dar kuoki kėta velniava, katruos minieti či visišką nier prasmies, bo pagalvuoset ka api kuoki tai narkomana ši daina. Nežiūront ka muzika yr klausuoma kuožna dėina, bet ta gilesni ir rimtesni perklausa įvykst maždaug karta į dvė savaitis ir trūnk api valonda, nu či tęp apytikslę, vidurkis ale. Tai če jau gaunąs atrušiavus vėsa šūda katron tenk perklausyti tam mona draugou, nuorynt priartieti pri deimontu. Tas mona pažystams nier iš tų kor vaikystie patyris pėrma muzikini orgazma toliaus klausuos tuos pačiuos muzikas, skirtyngą nu šeimyni gyvenima uns lynkis eksperimentouti su įvairiąs atlikiejęs ir stilęs. Panašu ka tas žaidėms su muzikiniu perlu paieškuom galietu būti begalinis, ja ne mona pažystama omžius, nu ir šęp fakts api mūsa laikinoma šiami garsų pasaulie. Jo, tas veikies jau yr matis 46 pavasarius, nuors gal nevisus prisimėn ir pagal optimistini mūsa parapijas statistika anam dar lėka kokėi 26, gal daugiau, bet gal būti ka ir mažiau, bo nežinuosi juk,kada išgėrsi tuobula angelų chuora.
Kudiel aš klausau muzikas garsų, kap ir galiečiau paaiškynti, tai svaigėn, o svaigyntėis mes visi nuoram, net ja ir nedrystam sau tuo pripažynti. Dar giliuo vaikystie mona perskaityts fantasts Klarks minavuoji pražutynga natų kombinaciji, katron žmuogus išgėrdis prarond viskuo suvokėma ir sekūndis dali patamp viešpačiu, kon paprastouju būdu banda patėrti LSD sektas garbintoję, nu kelyms lyg ir pavyka. Nesliepsu aš irgi užaugis nuoru būti Dievu, ir gal net vėina dėina suborsu nuosava holotruopini kvėpavima burieli. Bet grįžkem pri mona pažystama reikalų, katram lėka 26 pavasarę ir nesuvuokiams kiekis muzikas garsų, katrus uns lyg ir privalietu perklausyti, bet ar tikrą? Ar nier tęp ka mes įsivaruom sau tuoki lėga, plaukti su banga , sekti naujus reiškinius, tendencijas, o gal būt mūsa mega muzikinis orgazmas tūnuo kokiūs 60 tūsi pas kuoki Miles Davis ar Coltraina ar kuoki Orneta Colemana. Ja tęp pasitelkus šiuolaikėnis technoluogijas, turont ton dėželi su klaviatūra ir ausiniemis mes kuožna vakara pabundytumiam nours po kuoki 10 min skėrti tų banginiu kurybą, mažni pagerietom reikalą.
Pagal mona pažystam paskaičiavimus, ja uns ir toliaus tegalies skėrti tik valonda laika per dvė savaitis rimtesnies muzikas analizę, anam lėka 28 paras tam malonumou, ir če tik ja uns nemėiguos. Vuo čė ir iškėla didysis klausėms, ar verta gainiuotis tas naujuos muzikas sruovis ir intencijas ja tau belėka mažiau nei mienou, miegautėis muzikas garsąs, gal tiesiog pabandyti per lėkusi laika išklausyti milžinų paliktus vėrpesius? Ar tiesiuog keisti narkuotikus ir nekvaršynti sau galvuos api išgalvuotus pažystamus?
Kol bova rašuoma ta istuorija iš dėžutis skumbieji aukščiau paminietu atlikieju kūrinę, o pabaigą užgruoji tuoks Chets Bakeris.