Balūndis

– Parūrynsu per sobini, tai skraidysi kap balūndis, – tuoki tat frazi pratari mona gymta miesta banditielis, katron galiam užvadynti ka ir Juomantu, kokiam tai žmogiukou garaži, katras lyg ir laiku nesusimokieji einamuosis skoluos, banditu organizaciją. Kon či sliepti, tai nutėka mona vaikystis miestelie Telšiūsi, kor kėiti bachūrą ir gerbiamas paniatkis.

Ton frazi prisiminiau tik atsitiktiną išgėrdis istuoriji api raiša Nemirsetas balondi, katras veisąs pajūre regiuoni ir miegst prisigretynti pri važiuojončes mašinas ir skrėsti kartu, žiūriedams vairuotuojou tėisę į dūšia. Kudiel uns ton dara, muokslas dar netor atsakyma, bet vietinę žmuonis žėna ton balondi, pažyst, kap kažkada, kažkas pažinuoji Jėzu iš Nazareta. Ja torit giminaičiu, draugų ar šęp pažystamu pajūrie, paklauskit ar anėi yr kon girdiejien api Jėzu iš Nazareta, tfuuu, api raiša balondi iš Nemirsetas

Kai tau tik tryleka metu, ir tu dar tik bandą suprasti kas če per velniava vykst tami gyvenimi, nu ir dar nelabą yr su kou lygynti, bo to tik akymirksniu matę tuokius megapuolius, kap Vilnius,Saldą ar Seda, bet jau esi spiejis perskaityti Zaličiaus knyga, api seksa su kalakutu, nu tiesiog elementarę susirūpini sava seksualini orentaciji. Nu tu lyg ir supronti ka tavi duomien tuos klasiuokis su kasikiem, bet miesteli banditu paniatkis ir tava perskaityta literatūra, byluo, ka gal būti ir kitęp. Numūsi kor aš augaus, knyguomis bova užkymštas vėsas toštis erdrvis, tad mona nebova sūnku išsitraukti iš lintynas kuoki knygėki api Ruomas imperiji, kor galiedava rasti gan keistų užuominu, api tou metu vešiejusi gomoseksualistu ruoju. Tėn lyg ir bova paaiškinėms, ka ta imperiji bova kur kas aukštesnemi išsivystima lygie, kor jau anyms vėskas leidžiama, nu panašę, kap ir mona vaikystis miestalie. Tas unksčiau miniets Juomants, kap ir neturieji skrupulų dėl sava seksualinis orentacijis, galiedava pareikšti nuora dieti kuoki biča unt kapuota, o su anou bendraujyntis gangsterę į ton žiūrieji normalę. Tėisa nušuovi anon paskiau kuoks tai kileris restorani, gal tai kuoks meilis trikampis ar dar kuos biesas, kas jau tėn dab ir bežėna. Dar tou laiku mes sava miestelie turiejuom sava vieša pydera (sorry už formuluoti, bet ja rašyčiau gay būtu netikslę) Tas dėrba barmenu vėinami iš miesteli naktiniu kabuoku, pėlsti konjakieli ir niekam uns neužkliūdava (nu karts gaudava į snuki, bet ar če esmie). Tas tik ruoda ka mona gymts miestelis jau tada bova aukštesnemi lygie, api katron aš skaičiau protynguosi fyluosuofu knyguosi.

Vėins iš mona mėgstamų elektruonis muzikas kūrieju Muobis , skūndies ka anon supyzdina klasiuoką kai ons būdams paaugliu ateji į mokykla su sukniki, tai galieji būti panaši metą , kai po Telšius šliaužiuoji tuoks tik iš kaliejima įšejis bičas su tiubiteika ir muotrišku chalatu(ramadam kareem),tai bova tėi laiką kada New Yorki dar pyzdina kituokius, o Telšę jau bova kitami lygmenie. Glyndžiaus (tuoks bova chalata sąvinynka vards) nieks nemošdava, nu uns lyg ir kėits, kadaisi išprievartava mergelka (net keista, kudiel ne biča) ir galieji vaikščiuoti po miesta su Ruomas patriarchu tuoga.

Aš tada gyvenau tami miesti ir gan dažną bendraudams su miestelienąs, girdiedavau daug seksualiniu puoteksčiu turintęs pasiūlymąs, kap untai, pagaidynsu, parūrynsu, ar panašę. Nu vėsks lyg ir luogiška, ta aukštesni civilizaciji aplonki mūsa miesteli gangsterius ir mes gyvenam pagal Ruomas imperijas paniatkis. Tėisa pasakius nežinau kap Ruomas imperijuo, bet pas mumi dar vyrava dar tuoki taisykli, ka normalus bakūrs trątinąs su kou tik nuor, bet žąnijas tik su ta, katrą deformavą makštėis prieangi plievi. Nu turbūt nesūnku suprasti ka tokių nedaug nebova. Bo mes turiejuom sava vietinis reikšmies tratuli-reiperi,pavardi Skulskis, katras lakstydava po miesta su mustangu be lėmpu ir gaudydava, nekaltas mergelis, nu ir suprontama, bandydava deformouti tas plievis, bet įvyki liudinynkis bova paskleiduses žėnia, ka ne visad anam tai pavykdava padaryti fizioluogišką, tai tumet tiesiuog profilaktišką įpėsdava į snuki ir paleisdava. Nebier tuo maištinynka dabar, kažkąp pasikuori miesteli tardyma įzoliatoriou, gal pakuori, kas jau tėn dabą ir bežėna, tėis priš tai bova spiejis peršauti mona pažystamam galva, patam grumtynies su milicinynku anam peršuovi kiaušus, patam uns papjuovi tuoki biča kabuoki,dar paskiau kitam galva bova nupjuovis, nu žuodž tuokis buitinis smolkmenas. Dar biški pagarsieji kada po pakaruokliaus vaimens kažkas išsykasi anuo lavuona kapiniesi ir nukėrta galva, jau anam, su luopeta. Tėisa milicininką saki, ka nevisą nukėrta, bo matyt pas perfuormensa autuoriu bova gan boka luopeta. Tai vuot tas bičas gadėna gyvenima normalyms bachūrams, deformoudams tas plievis, tęp užkėrsdams kelia santuoką ir priversdams ieškuoti nuotaku gretimuosi parapijuosi, vėin dėl apkalbų, bo kap tu gali žąnitys su mergelka katra bova pavežieta su tou mustangu be švėisų, giedeli juk, kon draugą pasakys. Jau geriau kuoki ruskelka, ukrainieti ar suvalkieti su niekam nežinuoma history, nei vietini simpatiška mergeli, bet jau pavežieta. Tęp mėšris santuokas ir globalizaciji palieti mona vaikystis miesteli.

Būn dėinų kada aš tėku reinkarnaciji ar dar kuokiu tai pomirtiniu gyvenimu. Tai aš karts prisymenu tus personažus iš sava vaikystis – paauglystis su tuom anų nuodiemiem ir mąstau į kon galieji atgymti tas, ar tas velns, kuoki darba anėi turies atlėkti kitami gyvenimi, ka atsvertu sava pridarytu niekšybiu svuori. Atgymti į balondi nier blogą, bet mes nežinuom kuo tas balondis tėik lend pri žmonių, kas anuo galvuo dedąs, gal atsiprašyti nuor, ar da kuoki velne? Žinau tik vėina, nereikietu niekam nieka deformouti unt galėnis sėdynis ar unt kapuota ponavaliu, ar tou labiau pjauti galvuos. Kas žėna kuokiu šūdvabaliu teks atgymti paskou, begalybie gyvenimu už ton. Pavėrsti į laisva uora gūsi kap ir visų siekiamybi, tik su statistika šūdiną ir apsa nier normalaus ka pasiskaičiouti kada jau nebreikies vargti tuo ašaru pakalnie?