Pėrms mona dūms galieji būti Prima arba Kazbeks, mon bova pėnki metą ir aš su normalęs bahūrąs buvau paejis biški už numų, kur mūsa nieks nemati. Valdis prisydegi ir gerą patraukis padavi Sauliou, ( tokėi bova tikri, neišgalvuoti mona chiebrantu vardą su katrąs mon teka garbie susitėkti, giliuo vaikystie), tas biški palaikis pri lūpu padavi mon, pamatis moni dvejuonis, traukti ar ne, pasaki ka če yr tuoks amerikuonišks saldainis. Aš aišku jau būdams pinkių supratau ka če mels, bet tuoks smagus, gers, ka gal ir patikieti. Aišku užsikuosijau, tėi joukies, nu žuodž klasika, kap ir kožnami Holyvuda ar Mosfylma siužeti. Mona naparnykam galieji būti devyni ir kuoki keturiuolika, žuodž aš normalę turiejau draugieliu, katrėi galieji atsipūti atspardyti šėknas mona smieliaus dėžies bendrasąvininkams.
Moną tėvą nusprėndi neleisti monis į daržieli, ka aš neprisigaudyčiau blogų manieru ir patikieji moni į tuoki privatu dėinėni su kaimynu pėnsininku priežiura, pas katrus dažnuoką užsokdava mona jau minieti anūką-pusbsbrolę Valdis su Sauliu. Būsena po pėrma dūma jau gan sūnkę atsymenu, bo nutekieji mažumeli laika, bet gerą nesijaučiau, tai tikslę, o kor dar moralinis luomkis. Buvau girdiejis iš tėvų ka vaiks parūkis cigarieta nustuo augti, kas mon skumbieji kap pasauli pabaiga, bo noriejau kou greičiau pabaigti su ta tūpa vaikysti ir patapti dydeliu ir stipriu biču. Nu ir problemeli iškėla, o kąp toliau, negi jau tuoks ir būsu, tipo stats iš viedra pastuovę galiesu gerti, ir vėsks. Neištvieris lomkiu, kreipiaus į tievus ir viskon prisipažinau bliaudams ir klausdams kap dabą mon gyventi. Nu tėi aišku pribūri mon legendu, ka tas vėins dūms dar neturietu pakėnkti mona augėma procesou, bet jau ontras tai pyzdiec, nu ir aišku teka pažadieti ka nutrauksu draugysti su pypkis kluba naręs. Nenuoru aš či gėrtėis, bet žuodi daug maž išlaikiau, nikotina tūbieliu nevartuoju po šia dėina, nuors vargu ar jau beaugsu didiesnis, nebent į masi, o tėn baziliku ir šalaviju pašvėntinimą nesiskaita. Nu a kluba narius teka dar sutėkti ir ne karta, nuors anyms po mona išpažintėis irgi kliova.
Ka tai nebova gera chiebra aš supratau gal po kokių keturių metų, kai tryniaus kaimyna terituorijuo, kartu su milicininkąs, o kaimynu senoks su praskelta galva pasakuoji kap anūks Valdis bandi pasiskuolynti anuo pėnsija, o anam nesutėkus gava per krami iš radio imtova VEF ir tai pakeiti anuo nuomuoni diel pinigų srauta, tėisa dar longs bova išgerts, bet če matyt dėl stipręsnis įtaigas. Aš Valdi pilną suprontu, bičas pėlns jėgų, nuor viskuo dabar, bo nahuja tau reikalyngs tas Harlis kada tu jau nešiuoji smerčiaus baltinius ir vargu ar tau bestuov? Harlis reikalyngs če ir dabar, tėisa Harliaus tėn nebova, bet kaimynu dieduks turieji motopėrda Ryga, katra tou laikmečiu Valdžiou atstuoji Harli. Kas tėn žėna gal uns per priešu radiji bova girdiejis api Hells Angels judiejima ir anąm tai visišką susoka pruota, neskubiekem teisti, kap sakuoma. Ta motopėrda po gera pusmečiaus bova pavuogta, išlaužus mona kaimyna sandielioka, kriminalistą bandi pajymti piedsakus net su treniroutu šuniu, ale nieka nesigava, dėrba pruofą, būtu kas muni paklausis, unt karta būč įvardėnis, bet kam įduomi prasirūkiusiaus neūžaugas nuomuoni:(
( Valdi ja to dar gyvs ir skaitą, matą aš tavis neišdaviau, bo ir dūrniou bova aišku kas nupėsa ton Ryga)
Dab tikslę nepamenu ar Valdžiuo prikėrpa ir ton motopėrda, bet uns pėrms mona draugs katras sieda už reikala kap sakont, bent j au aš laikiau anon sava draugu. Patam uns viel sieda ir dar lyg tais sieda, ir aš dab nežinau ar Valdis sied ar lek kor sau unt Harliaus siediedams, bet kuokiu atveju gera vieja Valdi tau, kor tu besiedietumi.
Nu če tuoks lyrinis nukripėms, bo aš tai rašau kap kino scenariju ir žinau ka tokėi grandą kap Puipa su Tarantinu vertėn ton šūda.
Dar yr jausmynga dalis kap mes su kaimynu dieduku Šontuvu( tuoki bova anuo pavardie) pilam fekalijas į darža ir pagal šniūra sodinam bolbis. Bet če paliksam kitam sykiou, bo ilgą pasakuoti kap mona kaimyns būdams vokiečiu nelaisvie pramuoka tų gudrybiu, nuors dėl fekala unt bulbiu aš po šia dėina unt klaustoka, ar nebūs tai mona kaimyna baltarusiški vyjabuoną.
Vielinis unt nuosis, prisimynket tus katrus jau užmėršuot.