Ford LTD

Nusipėrkti dėdeli amerikuoniška mašina, kada tu beveik neturi pinigų, pasidari visai realu, kai mona darbdavys Kolia ir šęp gelbietuos užsimyni, ka anuo kaimyns, tenisa treneris, laika kėimi nenauduojama muodeli be numerių, katras dar gan geruo būklie. Bova tada 1994 vasara, buvau tik tik iškeitis gymtus Telšius į kuoki tai nelabą žinuoma Čikagas priemiesti. Skėrtoms bova akivaizdus (nu tarp tuo priemiesti ir Telšių), ja aš sava gimtami miesti nu numų iki downtowna pieškom atsirasdavau per 15 minučiu, tai čė nu tuo priemiesti iki Čikagas su auto reikieji valunduos (ja trafika nier, naus žuodis, katron greit įvaldžiau kap ir parkynga su šuopingu). Kaina bova tuoki, kuoki bova, 150$ ir ana dalinuos iš dvijų, bo aš buvau su draugeliu, katras mąsti lygę ton pati, ka be tačkas mes niekor nenuvažiousma (tas vadinąs blaivus mąstėms). Įvyka derybas, tenisa treneris šnekieji rusišką, mat bova maskviens, mes irgi normalę valdiem ton kalba, todiel turiejuom persvara. Puora sykiu apejėn aplink labą ėlga mašina su automatišką atsidarunčiuom lėmpuom, tradicišką paspardėn padondas ir pareiškiem, ka ta džonki (dar vėins naują pramuokts žuodis) daugiau nei 140$ neverta. Maždaug po 10 minučiu mes jau myžynuom kuokiu tai greitkeliu, aštouni cilyndrą griaudieji kručiau už pėnkta Bethuovena symphuonija ir mes buvuom ekstazie, o tėi maskviena nuruodimą, ka dab reiks išsijymti numerius, kažkuoki taitla ir da nusipėrkti draudėma (ble, gimtami miesti anei vėins mėnts net užsimėnis nier api kuoki tai draudėma) tiesiog kel jouka, mes gi iš Telšių, ja anam ręk, tegu jam. Ekstazę pasluopus, myntis api numerius pasidari visą luogiška, bet ka tai su taitlu dar atsistuos netol posi mašinas kainuos, mesteliej mūms alternatyvi įdieji. Ta alternatyva bova junk yards, kor mes jau buvuom užmatėn daugybi dar padabnų mašinu su numeręs (arba tou jougyngu pavadėnimu license plates), pajiemiem gal tris puoras (matyt su mintimi, jas tus atyms, užsisuksem kėtus). Prabiegus puorą sėkmyngu savaičiu, raižont su svetimąs numeręs, vistik kažkas apšvėiti pruota ir bova paaukuota ontra mašinas kaina, įsigynont vėsus reikalyngus samochuoda puopierius ir netgi draudėms.

Mašina papouli vykusi, matyt 1977 šūda neleida, išskyrus ton pūnkta, ka benzakolonkie buvą dažnas svetys, nu bet ir lopa iš vėitas, sankryžuo galiedava padieti kuoki nauja japuonki į vėita kap šėlta vėlna (aišku dažną gretimuo linijuo stuovintis samochuods nesuprasdava, ka če drags, bet če jau anuo problemas, o ir šiltuos vėlnas aš nečiupiniejis). Tėisa, muni syki apčiupinieji tuoks keists bičas su policijas unifuorma, pasigoldis unt tuo pati Ford LTD kapuota, gal kuoks giejus bova ar da kuoks biesas, kas jau tėn daba ir bežėna, bet, nugėrdis mona stebuklynga frazi, ka aš turists, susigieda ir nusivedis muni pri STOP žėnkla, kontrę aiškėna, kon tas žuodis reišk.

Gedimu aišku būdava, kaip untai nustuojėn veikti valytuvą per žvieriška lėitu, bet biškilielis kurybas, do šniūrą pririšti pri valytuvu laikikliu, mažumeli praverti priekinę lungą (ka šniūru negnybtu) ir tumpą sau su ronkuom, biegiu tai junginieti nereik, automats. Kas tas automats? Nu čė tuoks reikals, ka nuspaudis stabdi pėdala, patrauki tuoki metalėni ronkina po vairu, ir vėsks, myžini unt gaza, ka dryžiką joudi unt gatvis palėikt, ir jokių sankabu kap trečiukūsi ar šeštukūsi būdava, pyzdiec, kap patuogu. Technikas aš jau buvau matis, ne tik tarybinis, bet ir japuoniškas, bet api automata supratėma neturiejau, ka variklie reik tikrynti tepalus, tai kėikvėins balbiesas žėna, o ka automatinie greičiu dėžie yr tepala matuoklis, 1994 aš ir mona draugielis nežinuojuom. Auto baiginiejuos išlieta, dar vis tikiejuos, ka mes inpėlsęm tuo išganynga skysčiaus, bet kap paskutinie keliuonie negavusi atsigerti ir pėrma pavara (bo daugiau nebsijungi) bova gerą nukaukynta, užmerki lėmpas vėinami iš tų greitkeliu tarp nelabą žinuoma priemiesčiaus ir Čikagas.

Morals kap ir aiškus, nuors to ir žiaurę kėits esi, nebijuok kreiptėis patarėma, kad ir į tava akimis atruodonti luocha, katras, aišku, nier toks kėits kap to, bet bent jau žėna, kas y automatini pavarų dėžie.