– Nepirkit jūs tų Fordų, - su akcentu, kuoki tik gal turieti lietuviu dypoks, pasaki sens automeisteris Berienis, paklausis mona pažystama kun tik pėrkta Merkuriaus chauotiška varikliaus skleidama garsa. Kun tik pėrkts, tai dar nereišk, ka ta mašina vakar ar priš savaiti išvažiava iš gamyklas, nu konvejeriaus, ana nurėidieji maždaug priš 15 metu, bet kam įduomu kėik sykiu ana mati didžiuoji kanjuona ar skalava sava ratus abijų vundenynu purslūsi, aba kėik važnyčiuotuoju ana pakeiti, kun tik pėrkta, reišk nauja ir tašks.
1995 aš pirkau nauja Forda, gal būt reikieji paklausyti sena dypoka Berieniaus, katras matyt ne be pagrinda, turieji pykti un tuos markis samochuodu, bet viskon liemi vėins žuodis ir ons bova “Mustan” . Pakėrsti tuoki žvieri nuliemi keli faktorę, kap ir tuoks klasikinis ka be mašinas niekor nenuvažiousi, nu ir aišku kam reikalynga mašina su kuokiu tai sūnkę ištaramu ir tau negirdietu vardu, ja to gali pajymti beveik nuliuova 1979 laiduos Ford Mustang. Vietiniami laikraštie pri tuo skumbaus pavadėnima ir pakankamą solidžiuos 550$ sumuos dar bova tuoks žuodis kap “reliable”, nesliepsu teka pavartyti žodinieli, rasts rezultats mon patėka plius dar ir žuodi nauja išmuokau. Tuos kuosminis kainuos mokieti aš aišku nesiruošiau, nuors mona finansinis galimybis, tou muomentu mon leida įsigyti pusontra tuoki Mustanga. Žuodž pinigų kap šėina, veisies tad mona kišeniesi. Mona anglu kalbuos žėnias jau leida samochuoda turietojou pranešti ka už valunduos būsu pas anuo, directions atsisakiau, bo normalę gaudžiaus mapi (mienesis taksista darba su nuliniu anglu kalbuos lygiu davi sava vaisius) . Po valunduos aš jau trypčiojau pri tipiška vidurėnis klasis amerikuona privataus namoka duru, priš tai jau pats apžiuriejis kėimi stuovynti geruoką pavargusi įlėnktu sparnu nublokusis raudonuos spalvuos, keturių tekiniu samochuodu, su užrašu unt bagažėnis dongčiaus “Mustang” . Nesliepsu, panašumu į legendini 1968 muodeli kap ir nebova, o ir bičas atidaris doris mon nepatėka, nebūtina mokieti kalba, ka suprasti ka tau meloun api kuoki tai atsargėni mašina, su katra būktais muokies važinieti anuo žmuona ir įlėnki sparna, o dab jau pramuoka ir dėl tuo pardoud. Bleee, gaila negaliejau anam papasakuoti ka aš atvykis iš mela imperijas ir tuokius diletantus aš matau aiškiau už ton žmuogu pavardi “Rentgens”, bet nežiūront ka aš anon demaskavau savie, dar ir supratau ka be pinkių stuolniku, či nieka nebūs. Be Mustanga parjuoti irgi bova nepatuogu, bo ir draugų prašinieti ka vežiuotu tavi apžiurieti kokių tai džionkiu pakirieji, žuodž atmatavau aš tam rėibaloutam snukiou pėnkis Benjemijus Franklinus, ir jau po 10 minučiu myžinau vėinu iš Čikagas greitkeliu. Panašu ka bova pėlnatis, bo kitęp negaliečiau paaiškynti kam aš tai rašau, šindy.