Ka to esi Mustanga sąvinynks, signalizoun kelets dalyku, kap un tai pastuovę nykstontis tepals variklie, arba bėnzyns baki, bet tai yr niekis, palyginont kon tu jauti gerą užmyžinis unt gaza, kap suriaumuo visi šeši kubilą po kapuotu. Gaila aišku, ka tas žvieris nepapouli mon pačiuo anuo jaunystis žydiejimi, kada arklę iš po kapuota dar nebova išsilakstėn, bet ir su likusęs tu jautys kap Dievs, liekdams vėinu iš Čikagas greitkeliu. Tami kažkas yr, bo tu varą į prieki į ateiti, betuoninė žarna nepaleid (kap saki vėins, vietinis reikšmies poets, tęp ir nepublikavis sava kūrybas), aišku gali bandyti ir atgal, bet ilgą netrauksi: arba kaklas pavargs, arba mėntą pajyms. Tyms aišku gali priborti, ka turists ir nežinuojau, ka tęp negal, nu ir panašę. Suvaidynti turista, kai tavi sustabda road patrol, mon tas pats, kap radijas kanala perjungti, vo amerikas ambasaduo įkūnyti sportoujynti taekwondo treneri bova biški sudėtingiesnis vaidmou.
1994 vizu į štatus nieks šęp nedalėna, reikieji kažkokiuos priežastėis, kuoki velnia tu tėn trinkys. Draugielis mona jau turieji ton stebukla, vadinamu viza ir sūvedi moni su spuortininku koupeli, katrėi bova įsukėn gera versla. Bizni plans paprasts, sakykem Vilniaus taekwondo klubs, gaun pakvėitėma dalyvauti kokiuos tai varžybuos, Dieva užmirštami amerikas priemiestie iš vietini kluba. Nu ir tada surenk kuoki dešymt luochu, pajem nu anų po 800$ ir ved į ambasada. Ka atruodytumi kėičiau, prikabinie tau unt kakla medaliu, prikaišiuo dipluomu į kišenis, o karts net ir į laikrašti “Sportas” met kuoki straipsni api neregietus taekwondistu pasiekimus (fake news jau bova ir tada). Po trūmpa puokalbi su su bizniaus vedliu, mon kažkudiel bova patikietas sportoujonti treneri pareigas, nuors kelets aferas dalyviu bova kor kas vyresni už muni. Nustatyta dėina prisistačiau į ambasada su tieva velvetiniu kuostiumu (nu, ka solidžiau atruodyčiau, treneris juk). Vėsks turieji praeiti įprastu ritmu, bizniaus vedlys, mona bendravardis vertiejava mūms pri tuo keista neperšaunama longa, už katruo stovieji vidutėni omžiaus muotriška, turiejusi nulėmti mona tolimiesni gyvenima (valkatauti sava gimtami miesti, ar valkatauti už pelkis kokiami tai Čikagas priemiestie). Kadangi kalbuos nemokiejau, bet ir iš mimikas supratau, ka tėi taekwondistą su mūsa vadybininku aną jau yr geruoką pabuodien. Keisčiausę bova, ka ta amerikas ambasaduori ruodi su ronka į muni ir kažkon aiškėna mūsa vedliou. Nežinau kudiel, nuors greičiausę dėl tieva velvetini kuostiuma, aš buvau paprašyts dar kuoki 40 žmonių akivaizduo pademonstrouti taekwondo kovinius veiksmus. Mūsa idiejinis lyderis, praradis bet kuoki veida spalva, pramurmieji mon, ar tu gali kažkon paruodyti? Ar aš galiu?? Aš, bičas iš Telšių, ruodis videka su Brusliu visami rajuoni po kelis kartus. Ar aš galiu??? Tu dar negimei Muratai, aišku ka galiu. Atejau pri tuo neperšaunama longeli, tuo pusie bova anėi, lyg ir dievą kokėi tai, katryms bova doutas galias sprėnsti mūsa likimus, mona pusie siedieji gal kuoki 40 mūsiškiu, iš katrų musiet 90% bova paruošėn kuoti melagynga istuorija, ka tik gauti ton štempeli pasi. Aš irgi noriejau tuo štempeli, tad vaidynti nebova sūnku, net, sakyč, kažkąp vėsks naturalę gavuos. Pasiruodėms bova trūmps ir aš anuo nelabą prisymenu, bo įtampas irgi bova nemažą, nežiūront, ka aš kėits rytų kovų žinuovs. Kelets dvėgubu smūgiu ronkuom, pusietėns suktuks iš kuojas ir teatrališks nusilinkėms priš ambasaduori sudiejus do kumščius pri krūtėnis, kap buvau matis pas Brusli. Po sekundis ana padari ton pati nusilinkėma kituo stėkla pusie ir nusišypsuoji, mon bova žiaurę karšta su tieva velvetiniu švarku.
Kap išeidiniejuom iš ambasadas, mūsa taekwondo treneris neužsičiaupdams žarsti mon padiekas ir gal 10 sykiu pakartuoji žuodi išgelbėjai, bet šimtėnis vėinuos ontruos atgaliuos nepasiūli (tai vuo Tuomą, ja kokęs tai kanaląs iki tavis dalieks tas teksts, žinuok, esi mon skoluo alaus) .
Tas bova praeitie ir tau jau nebsvarbu, nes tu myžini su Mustangu greitkeliu į prieki, į ateiti, tėn, kor dar vėsks tor atsitėkti ir tau visišką vėinuodą, ar tu vakar amerikas ambasaduo kokybišką atliką roundhouse kick, ar atruodę kap luochs sava 40 žiūruovu akivaizduo.