Ka tęp rimčiau pagalvuoji tai route 66 tiesiog prastą asfaltouta kelia likutę išsimietėn šalia dabarčiaus nauduojamu kelių, ja kas esat važiavėn nu Saluntų link Platelių, galit skaityti ka esat liekėn legendiniu route 66. Bet gal če tik mūms tas kels nepasiruodi tuoks svarbus, bo mes nedieviejuom uodiniu kelniu ir neturiejuom elniaus kaula sagtėis, tiesiuog buvuom do paxmielingi bičą nu Telšių katryms tas literatūras veikalūs aprašyts reikals pasiruodi šūda verts.
Nuostuoli su 66 vėiškeliu turieji kompensouti mūsa sekontis tėkslas, pavadėnimu Grand Canyon. Palyginus su keliuonis pradžia, svaigalų kiekis bova sumažiejis gal per posi, bet nu tuo bova tik baisiau, bijuojuom viskuo, pradedont šerifu katras gal tykuoti mūsu kožnuo bėnza kolonkie, iki skūnsa katras galieji palysti po ratąs ir suteikti preteksta tam pačiam šerifou aka Clint Eastwood mumis areštouti. Teka sukaupti dronsa ir kažkąp praslysti pro vėsas pynklis ir pamatyti užraša ka didysis karjiers jau či pat. Privažiouti tęp artėi kap pri Palunguos karjiera šlaita, tėn neleida, ta palikėn sava runneri atpiedinuom pasižvalgyti pri skardžiaus. Nežinau ar tas karjiers tuoks didyngs ar mes atliekiem su mėlžinišku paxmielu, bet aš negaliejau žiurieti i bepruočius japuonus katrėi dari fuotkis iškišėn vėina kuoja ir ronka i praraja, ir tai aš, katras kap ir netor aukščiaus baimis, vėins iš “Thomas Window Cleaning” fundatuoriu, tiesiog juokinga. Nemanau ka kas paklausys mona patarėma, bet ja nuorit išvysti tikruoji, didžuoji karjiera didybi, torit atliekti tėn su panašiu paxmielu (kap ton pasėikti yr aprašyta pirmuo ir ontruo keliautuoju knygas dalie), namelounu ne kon. Kažkap supratau sava mizerija pažvelgis i tus tuolius su besifuotkinuntęs japuonąs. Nu tuo kanjuona tep greit nepabiegsi, kap Palunguo, tėn varą, varą ir vistėik tau siūla pasižvalgyti į vis naujus ir gan panašius vaizdinius. Kokiuo pėnktuo aikštelie mūsa kuntrybi baigies, ačiū matiem, reik judieti.
Kor judieti? Apsisprėnsti bova gan lėngva, lempučiu miests ar Las Vegas kap anon dar vadėn, mūsu visišką netrauki, o miestoks pavadinėmu San Diego skumbieji iškilę, tai mes tėn ir pasukuom ienas. Kažkap blogą paskaičiavuom sava sustojimus karjieri, nepavyka grįžti i civilizacija kap totalę užtema, nežinau kap daba, bet prabiegusiami šymtmetie dar būdava tokių kalnų keliuku kor to galiedava užliekti niekam nesukeldams stresa ir sustuoti ar bent jau mūms tęp ruodi, kap mes pakilen i kalna sustuojuom kuoki tai fermeriaus valduosi.
Patuogę įsitaisėn, patuštinuom kuoki tai vyna buteli ir krituom unt panelis, giliu tikrų keliautuoju, smėrdončiu pažastimis mėigu. Keltėis teka su sauli, bo bova nerealę šalta, tuo kalna papiedie, teka gerą prakaukynti varikli kol galiejuom pradieti lunkstyti pėrštus. Itūžėn diejuom i pėitus link San Diego, kami ta šiluma
Šėlumuos sulaukiem jau už pusdėiniaus, dar bova gers gals iki San Diego kai temperatūra pradieji lėpti virš šymta faringėita, mūsa žvieris Toyota Four Runner kondiškis neturieji, šalta nebebova. Kažkuokiu stebuklyngu būdu per meksu radija nugėrduom ka būs pasauli futbuola čempionata finals, net supratuom ka luoš francūzą su braziląs. Tai bova svarbi žinia maždaug kap sužinuoti ka Dalia Kutkaiti su Inga Borhingaginieni žais tenisa prieš Gandi su Kalenbachu. Stuojuom klausyti.
Kaimielis i katron papouliem nusokėn iš greitkeliaus kuoki tai kalna papiedie, iš pėrma žvylgsniaus atruodi kur kas galingiesnis už Salontus nuors ir nesimati bažnyčias buokšta. Puora sykiu praskruodus ton miestieli ir nesutėkus tėn ni gyvuos dvasias teka keisti nuomuoni ir atidouti pirmoma teisi Saluntams, bet tada sutikuom gatvie apspangusi meksėka ir paklausiem kor če vietinis kabuoks kor ruoda putbala. Oi, mygom gavuom direkšiuonus i vietini “Pakalnoti” katra vadinuos tiesiog “Sport Bar”. Geriausis vėitas arčiau labą dėdeli televizoriaus jau bova užjymtas, gal kokių aštounių vietiniu smogiku, mes įsitaisiem kėik atokiau, pri tuoki mažioka, subtilaus-apvalaus stalioka. Barmena veids ruodi kuoki tai pagarba mūms ir plius nustebėma, kas davi mūms suprasti ka če yr totalę turistu lonkuoma vėita. Jiesti noriejuom kap meškas iš po žėimuos mėiga. Aš užsisakiau chicken Burrito ir Negra Modela atsigerti, a mona kolega papraši Giant Burrito ir atiatia. Barmens kažkap susimieti , bet dar syki pasitikslėnis dėl užsakymu atneši mūms dar vėina subtilu-apvalu stalioka. Kažkąp pašnairavus i kaimynus supratau ka nier blogą ka mes ne prancūzą, aišku anėi irgi ne brazilą, bet savisaugas instinkts davi žinuoti ka reik būti neutralyms tami sudėtyngami mači. Kol atneši maista aš jau spiejau patuštynti keleta Modelu, kolega irgi panašę ir tada mūms pryneši padieklus, pradiejau suprasti kam tas ontras stalioks, bo Giant Burrito bova dukart didiesnis už Karmielavas “Tigrasas” cepelina ( katron aš esu matis tik fuotkie) tai bova tėkras giant, katruo posi tep ir nesujiedi mona pakeleivis , aš sava regular vos vos, bet sukirtau. Po maista ir alaus atkutuom ir kuo tai nusprėndiem aktyviau regouti i įvykius aikštelie, dar po keletas alaus, smogikams pirmuo eilie tapa aišku ka mes francūzu pakaliką ir gal net kokėi Zinajidą Zidana giminaitę. Scenarijaus ka laimies Zidans 1998 mes neplanavuom ir pasibaigus varžybuoms stuoji tuoki nejauki tyla. Gauti i galva mon nebova labą baisę, tiesiog nenuoriejau duntų prarasti, bet kap nebūtu keista, vėins iš meksu (gal ne patst Hienka) prieji ir paspaudis ronka, pasveikėna su pergali. Vo če yr pagarba, če aš suprontu kai kažkuoki nežinuoma meksu kaimeliaus gangą pasveikėn žemaičiu suostėnis čiuvakus su pergali ir palynk laimynga keliaus judont link west coast.
Šuokuom i greitkeli, vundenyns jau bova ronka pasėikiams, mes kontini ir laimyngi, plius mūsa nepaleida jausmas ka Zinajids Zidans sied šalia arba tarp mūsu.