Iš Vagonetis Archyvu
A kastumi?
Tuoks bova retuorinis klausėms pagyvenusi vyriška, besiduomonti kuosmuosa platybiemis ir įvairęs istuorinęs įvykęs. Būtent pasibaigus diskusijuoms api Saturna įtaka žmoniems ir Garbačiuova-Rybentruopa pakta, nuskumbieji tas klausėms iš Danieliaus Lūpu. Danielius bova tvėrta sudėjėma laisvą somduoms darbinynks, katron darba metu reikdava pristabdyti, bo dėrba savis negailiedams ir negalvuodams, už anon galvuodava, tas kas sumdydava. Dar mokykluo paaiškieji, ka su galvuojimu Danieliou yr prastą, iki trečiuos klasis kažkap dasivari, o toliaus ni krust. Tęp ir siediedava tuoks peraugis trečiuoks klasie su muoksla draugąs, katrėi kuožna rugsieji būdava vis kiti. Kap Danius pradieji nebetėlpti į klasis soula, mokyklas vadovybi nusprėndi ka muoksla anam jau užteks, rašyti-skaityti uns kap ir pramuoka, vo kuo daugiau bereik, bova tada kažkor 1955 ar panašę.
Klausėms bova adresouts tuo pačiuo vagonetie po dėinuos darbų siedunčiam smulkaus sudiejiema visų galų meistrou Vaciukou. Puslitris numinėkis jau eji pri pabaiguos, tudiel jaukiuos vagonetis virtuvikie įsitaisėn vyrą, bova gan šnękus. Tėisa Vacioks bova santuriesnis arba tiesiog uns į Danieliu žiurieji iš aukštiesni intelekta turinčiaus žmogaus poziciju. Kas bova naturalu, bo uns dar pri Smetuonas Alsiedžiūsi bova pabaigis tris skyrius, kas atruodi nepalyginams pranašoms su tris klasis pri roski pabaigusi pašnekuova. Vėsa sava darbynga gyvenima atidavis tarybinie melioracijuo, Vacioks neturieji didelių priekaištu tuometinę valdžią, komandiruotis po kaimynini Baltarusiji, leisdava užkalti po 500 rubliu per mienesi, kas dabarčiou būtom prilyginama sėkmyngą bitkoinu prekybą. Taupę gyvendams daugiabutie, Vacioks dieji alga pri alguos į taupkasi ir 80 pabaiguo anuo sąskaituo gulieji kuosmini 100 000 rubliu soma. Gulieji, kol nepasiruodi Landsbergis, Kubėlius ir visi kiti. Vacioka indielis švelnę taront nueji velniop ir suoti senatvi jau beruods užsitvėrtėnis senuolis viel stuoji i darba rynka, kor vėina vakara po sunkių dėinuos darbų, virtuvikie pri numinėkis iš Danieliaus lūpu išgėrda klausima, a kastumi?
Klausėms bova sokts, kartu su klausimu unt vertuvėkis stala bova pradiets daryti brėžinys ar tai makets. Vacioks negalieji ignorouti sava pašnekuova, bo atsakyma galieji douti tik žmuogus gerą išmanontis melioracija, kuoks uns ir bova. Esmie bova tuoki, ka vėina vaikų darželiaus pėiveli dažną patvyndava rodeni ir Danielius bova paprašyts iškasti melioracini kanala, tik bieda ka aplynkinę sklypą bova aukščiau ir kor nuleisti vondini vėins Dievs težinuoji. Iš čė ir kėla tas svarbiausis klausėms, kasti ar nekasti? Klausima vizualizaciji atruodi gan įspūdyngą, vaikų darželiou pažimieti bova panauduota pjaustima lėnteli su lašinių bryzu, į šlapiausi terituorijas vėita bova pastatyta čierka, pustuštis numėnis butelis atstuoji katilėnis kamina, katras neturieji juoki ryšiaus su ta situacija, bet matyt tęp reikieji pilnam maketa išpėldimou. Peilę ir šakutis bova darzeliaus tvuora, dounas rėiki žymieji šalimąs praeinonti kelia, grietinis indielis kaiminystie stuovynti nama. Danius bova pakilimi, greitą unt stala pradieji trūkti vėitas o stalčiou peiliu ir šakučiu. Vacioks žiurieji i ton chauosa geruoka susierzėnis, uns net negalieji pasėikti čierkas katra šiou muomentu atlėka svarbu vaidmeni maketi. O ir šęp uns turieji pėlna teisi būti nepatenkynts sava sugėruovu, mat tas garbėna Landsbergi ir niekėna Brazauski, o Vacioka atveju vėsks bova atvirkštę ir dar ta nesamuoni su tou maketu, kad net išgerti nebgal. Žuodž pri stala siedieji do vyrą, katrus labiausę vienija ta nedabaigta samanis butelka, bet tarp anų bova nenusakuoma gyliaus melioracinis griovys politinęs klausimąs. Skirtyngas pažiūras išryškėna ir totalę kitokėi atsakymą i ton sokta klausima, Vacioks pasirynka atsakyma kasčiau, bo pagal anuo luogika, nuors ir šūda su kibiriukąs nešiuoti, bile pinigus muok. Nu a Danielius lynka pri nekasčiau iš tokių taurių sumetimu, tipo kam dėrbti ja vistėik rezultats būs šūdėns, vondens tai nier kor nuleisti. Kitęp sakont titanu dvikuova, Landsbergis versus Brazauskis, kasti ar nekasti. Samaguons baigies, jau beruods ir aistras aprėma, bet Danius, jausdamuosis nugalietuoju, vis palynkdava į Vacioka posi ir pikdžiugišką paklausdava, a kastumi?
Padiejau nurynkti stala, sudieliuojau maketa detalis į stalčius ir lintynas, sugieruovą suguli į kėta gan jauku vagonetis kumbarioka, puoilsis. Buvau jau įmėgis(mėiguojau trečiami vagonetis kumbarie, karališkūs apartmėntūs) kap išgirdau pikdžiugiška Danieliaus klausima ir žaibiška Vacioka atsakyma, kasčiau, kasčiau Dani jau naktis mėiguokem, pažiuriejau į telefuona ruodi kelis minutis po trijų. Bova 2000 metą, beruods ketvirtadienis.
AtA Danieliou ir Vaciukou.