Giliuo jaunystie tarp įvairiausiu darbų katrus teka dėrbti, papouli kap tais mon ir DJaus dounas paragauti, leidau mozika iš babinu, kasiečiu ir netgi buvau užkūris keleta video diskoteku, kas 90 tų pradžiuo atruodi gan įnovatyvu.
Eilėni diskoteka Eigirdžiu kultūrnamie, šeštadieni vakara nežadieji jokių siurprizu, keleta nedrunsių mergikiu, puora vietinis reikšmies Šuociku, trainiojuos po sali laukdami kažkuo tai. Tas kažkas atlieki su senu Puoršu, prakiorusi glušerka. Tas kažkas bova visų Telšių ir Plūngis siaubs pravardi “Štonga”, samaguona karalius (sklėda kalbas ka Štonga unt karta raug dvė tuonas, kas kieli nuostaba mon raugusiam 20 lytru tąs laikąs) . katruo prisibijuodava visi sveika pruota žmuonis, kadangi aš savi laikiau būtent tuokiu, tai nusiteikiau blogiausiam (tai yr būt iškirstam).
Mūsa muzikinę skuonę skyries, ton supratau unt karta pagavis paniekinama gangsteriaus žvilgsni. Vietinis reikšmies Šuociką skubę įšaji parukyti i kėta kaima gala, mergėkis sulynda i tumsiausi salis kompa. Gangsteris kor tai dynga, palėkis salie sava atsyvežtas žiurkikis ir da vėina kaubuoju pravardi “Pistalietovs” . Nežiūront ka salie plyšava galyngas S 90 koluonkis, mona ausysi spėngi nejauki tyla, katron bandžiau nutraukti tai užsidiedams tai nusijymdams ausinis (buvau matis per MTV ka DJę tęp dara) . Pargrįžis gangsteris pėršta muostu pasivadėna moni pri scenas kampa ir kap bebūtu keista nieka skaudaus mon nedari, tiesiuog įteiki mon mėlyna Sony kasieti ir pasakis ka če abėdvis posis geras, lėipi atsokti nu pradžių ir paleisti. Drebunčiuom ronkuom įvykdžiau zadanija ir salie pasigėrda dieviška Olega Gazmanuova meluodija “JIESAŪL JIESAŪL”. Atvykieliu nuotaikas kap mat pasitaisi ir visi jiemi trypti Eigirdžiu kultūrnamiaus gryndis kap tikri eržilą. Tada moni aplonki aiški vizija, kuoki mėlžiniška ir nuostabia galia tor muzika, kuoki taikuos ir ramybis atmosfera gali atnešti tam tėkrų garsų vibracija. Harmuonija ilgą netroka,sekonti gabala garsų vibracija, kažkou neįtėka gangsteriou ir iš monis bova skubę pareikalauta padouti kasieti su dangiškuom meluodijuom ir vėsa šuobla kap tai žaibiška palėka sali. Už sekūndis prakiorusis glušerkas garsas riaumuoji Telšių link, o pas mumis prasidieji šuokiu vakars, kas ir bova anonsouta reklaminiami plakati. Aš išgieriau puora burnieliu vietiniaus whiskiaus, greit parsirada vietinę Šuociką (dar paklausi kas tėi gaidžę kor kon tik bova?) ir šeip pradieji rynktėis publika, kas pašuokti kas išgerti, žuodž diskotieka įsilingava.
Kai aš išgirdau per radiju ka kultūras žiburys Olegs nebova įleists pas mumi, pėrma kas ateji in galva, yr tai, ka gal ir gerą ka neužėlgu po tuos diskotekas, kažkas nušava gangsteri “Štonga”. Neteka žmuogou pamatyti tuos giedas, ka nusipelniusi visakeriuopa dainiu išgrūd iš šalėis, neleidėn net JIESAŪLA sugėiduoti.