Karkasinis II dalis

(Katruo jūs turiesit galimybi iš arčiau susipažynti su Vacluovu)

Užbiegus įvykiams už akių, karkasini nama mes pastatiem, nežiūront į užsakuova abejuonis, ka ne tus pasomdi. Pabaigus pamatus, įšejuom į žvyra, prasidieji maloniuoji dalis - karkasas.

Kai tu tori normalu pagrynda, vėsks yr daug papraščiau, montouti medini karkasa yr daug maž tas pats, kas dieti iškepta steika į liekšti, jau kap ir nudėrbta vėsks, lėka tik kelets štrichu, padažas, papuošėms ir panašus mažmuonę. Vienyntelis skėrtoms tarp statybininka ir viriejaus yr tai, ka statydams karkasini, tu palėikti žymi, tu keiti gamtuovaizdi, ar tiesiog lėikt kažkuoks tava darba rezultats, kou tu geriau atliką sava darba, tou ilgiau visi matys tava kūrini. Vėrtuvie vėsks atvirkštę, kou skaniau ir gražiau pridieliuoję patruovu į torielka, tou švaresni ir tuštesni liekšti gausi atgal, tava įdiets triūsas pavėrst į šūda, aišku ne iš karta, bet po kelių valundų, tava meilis pripėldyti steiką ar burytą ein į unitaza tratiedami. Tai kuoki velni dėrbti ton pragariška darba, katruo rezultats pastuovę kanalizacijuo? Be vėrtuvis esu dėrbis ir dar beprasmiškiesni darba, pati nematomiausi darba, kuoki tik galieji sugalvuoti žmonija nu tuo laika, kai, beruods, 14 omžiou išrada stėkla, tai vadinąs lungų valėms. Tarp Windows 95 ir 98 aš turiejau "Thomas Window Cleaning" kompanija, katra dar ir dab sėkmyngą vysta veikla Čikagas apylinkies, tik jau be monis. Valiau longus airiams, škuotams, lėnkams, žydams. indusams ir visyms kityms Amerikas užkariautojams. Svarbiausi longų valyma taisykli yr tai, ka tava darbs tor būti nematuoms, nepalik juoki klecka unt longa ir, žiūriek, namų šeiminynki su šypsena išrašys tau čeki ir dar tipsu dadies. A paliką dryžika kor ir jau problemas. Taigi reziumoujont, do beprasmiškiausi darbą, pasaulie  yr puovara ir lungų valytojaus, katrūsi aš turiejau garbies pasitrainiuoti ir tumet nusprėndžiau eiti pri karkasiniu.

Statyti kaimi medini nama yr dydelis dyvs vietinems, bo tūls kaima gyventuos atejis praded tau pasakuoti, ka reik budavuoti iš blokieliu ar plytu, nesupūs ir nesudegs tada, nu ir vakam dar užteks. Pagrindinis mūsa svetys būdava Vacluovs iš beveik greitimuos sodybas, žėls senuolis, kadaisi Jokubava kaimi pasėikis asmenini ir vėsa kolūkiaus rekuorda su traktoriumi, apardams neregietus pluotus žemis maityntuojis. Vacluovs ne tik ka bova įdiets į garbies lėnta, bet ir su žmoneli už nuopelnus gava dovanų keliuoni į Maskva, į VDNH paruoda, tas bova setyniasdešymtu pabaiguo. Daugiau Vacluovs niekor nebova, net Baltijas jūras nemati, bo kor jau tėn 39 kiluometrą nu Rusinų kaima. Maskva Vaclovou nepatėka, bo dvė savaitis negava bulbiu pajiesti, vėin tik unt vermišieliu gyvs bova, dar per sava dorna galva pasijiemi pusmaiši vobulų iš suodna. Vo ka bulbiu tėn nebūs, nieks nepasaki. Nu bet saki grįžėn su žmoneli mienesi vėin tik bolbis jiedi ir jau tuokis skanis anuos bova, ka sūnku ir apsakyti. Su Vacluovu užsymezgi gan gers ryšys, mat uns irgi bova kaštavuojis puovara dounas, pas ruski karūmenie. Saki skanę tušonkis su bolbiem padarydava, vėsi gėrdava. Vo kai mes iš drebuliniu lėntų sumeistravuom anuo  kiauliukam luovi, gražę suleiduom, kampus apšlifavuom, žuodž  truopnę padariem, po apylinkis pradieji sklėsti kalbas api gerus meistrus. Sava CV tarp keletas karkasiniu ir mūriniu namų, dar galiečiau įsirašyti ir ton drebulini luovi Vacluova čiukems.

Darbs Rusinų kaimi pri karkasini nama bova kap meditaciji, po vakarini pasisiediejima pri lauža, vakarienis, dūminis pirtelis, katron buvuom pasidarėn gal per valonda vėina šalta pavasari vakara, vykdava radija seansą ir tada jau apapa. Liets rytmetys, pusrytuką, karts nueidavuom iki Veivėrža patikrynti srovies stiproma ir tik po tuo čiupdavuom drielis, bulgarkis ir cirkuliarkis, tada veiziek Vacluovs atkiaušindava su tuočki ir dalgiu, garšvų paspjauti sava paršeliams, mat saki ka tas y vytamyną. Pusvalundoka pakalbiedavuom, biški sužinuodavuom Rusinų ir Veiviržienu naujienas, nu kor kuoki Nataša gyvenusi, su kou susidiejusi bova, nu kuo kuoks bėnkarts kaimi laksta, nu žuodž kap delfie. Ėlga laika gan keista bova, ka apylinkiesi tėik daug ruskelku tou pačiu vardu gyven, aš jau net pradiejau galvuoti, gal ir kaima pavadinėms Rusiną kažkąp susiejis su ruskęs, bet eiguo supratuom, ka vėsas muotriškuosis giminies atstuovis Vacluova pasakojimūs yr Natašas. Mūsa senuoliou velniška įspudi dari  vagonetis prabonga (kur mes budavuodami gyvenuom), uns tokių mundrybiu nebova matis, moderni vėrtuvi, do kombarę su fuota tapetas ir kitokęs mena kurinęs unt sėinu. Vacluovou mestelieji mynti, ka tas vėsas gieris 10 gabalų mažiausę turietom kainouti. Manau, ka gerą padirbiejus, galiejuom ton vagoneti unt lygiūju išsimainyti į trijų hektaru Vacluova sodyba su privačiuom kapineliem, katruosi mišias karts laikydava Telšių vyskups, o, velnę žėna iš kor atsiradis, Gražulis spausdava Vaclovou ronka. Nu ir, aišku, mūsu senuoliou tuo užtekdava, ka per ateinončius rinkimus kryžioks būtom padiets už ton liguoni, bo juk daugiau nieks anam ronkas nespausdava.

Po pėitu, mūms bedieliuojont blanki pri blankis, atsibuogindava kėts kaimyns Ontanis, atidėrbis kranista pamaina uosti, atsinešdava alaus. Tekdava biški daryti pertrauka. Ontani nesaną bova palėkusi buoba, tat uns depresava biški, kaima felčerka bova parekomendavusi pagerti "Sedatyva", a ka geriau praryti, tai ons užgerdava alumi. Tai kuoki valundėki tekdava pabūti Ontaniaus psichoterapeutu, kol ons visą nesuskysdava, pasiklausydavą vietinis naujienas jau iš kituos varpinis. Pasiruoda, ka Veiviržienu apylinkies buobas grynas kūrvas, bėrbinąs su kou tik papoul. Nu kon padarysi, tuoks gyvenėms, dažniausę pasakydavau Ontaniou, bo ir ištėkra, kon jau če bepadarysi su tuom buobuom. Kai visą užknėsdava, paprašydavuom, ka Ontanis uždarytu longa, bo į truoba gal snėiga prikrėsti, tai tada tas įšeidava nieka nesupratis.

Karts užliekdava kaima metalists Skuomants su sava ronkuom patuobulynta kiauliki. Seną rusišką motopėrdą buvo pasidaris kabina iš įpatyngą lėngvuos skarduos. Vėina tuos skarduos lakšta aš buvau radis griaudams senuoji truoba, palei kamina. Pajautis skarduos svuori ir kokybi, pasidėrbinau iš anuos tuoki lauža vėduokli, ka šašlyką geriau keptu. Vacluovs užmatis ton mona dirbini, paaiškėna, ka ta skarda yr iš vokieče lektova, katron per kara pašuovi ruskę ir uns nukrėtis į dauba pri Veivėrža. Anuot Vacluova, nukrėtis lakūns jau bova nebgyvs, dar kuojis kažkąp tais bova atitrūkusis nu kūna. Tuoki vaizda pamatėn Rusinų gyventoję nusprėndi, ka lektova anam jau nebreik, daug nelaukėn, čiopa kas kon galieji, kas tekinius būsimam vežimou (katrėi dar ir dab tarnau ir dažną yr sutynkami Rusinų - Tarvydų greitkelie), kas matuora pouli ardyti, nu ir ta lėngva skarda nu kiebula, bova greit nulukštenta. Kap ruskę atlieki tai ir nebsuprata, kuoki či padara anėi numoša. Dėl Skuomanta muzikini skuoni, aš visišką nieka negaliu pasakyti, bo bendravau su anou gan trumpą, uns tik užliekdava pasiteirauti, gal kuokiu metala šmuotu nuoram atsikratyti, mat uns su malonumu išvežtom ton lauža ir tęp dasidortu pri pėnsijas. Kas kita su melomanu Vacluovu, tas tai jau nepraleisdava ni vėinų gariniu, kap tik pėnktadienis, tęp Vacluovs pasijam alaus ir doud gara. Aš dažną gėrdu iš įvarių žmonių, būk tais, tai yr tūpiausi laida katron reiktu uždrausti. Tai če jumis reik uždrausti, Vaclovou "Duokim Garo" yr tuoki pat svarbi, kap ir jūsa serialą per Netflix ar HBO.

Kalbont api muzikas garsus, statybvietie, onžoulų apsuptie, nelabą jau kas ir norieji skumbieti, per pati darbų įkaršti užtekdava ir vietini noiza, o vakari pri lauža bova išbandyta daugybi grupiu ir stiliu. Po ilgų paieškų bova sustuoti ties Casha albumu American IV ir keletas Buoviaus gabalų, tokių kap Space Oditty. Teka ir Vacluovou ton išklausyti, bet kadangi anam ne kažkon su klausa, tai ir neklausiau, ar girdiejis.

Tarp įvairių lunkytuoju, katrėi kažkuokiu tai būdu atsidordava pas mumi, bova ir egzuotikas, bėnt jau Vacluovou tęp atruodi. Syki pas mumi viešieji bičiulis Nikis, puovars iš Graikijas, biški ilsiejuos ir tou pačiu praeji praktika distiliavima akademijuo, katra karts nu karta atsidarydava vėinami iš senų svėrnu(sava reikmiem). Nikis bova baigis muokslus Onglijuo, api distiliavima ir konservavima žinuoji aibi dalyku, ale praktika išpouli pėrma karta. Žuodž, mes kelam gegnis unt stuoga, vo graiks svėrni keravuo kalvaduosa gamyba, kap tėkras emigrants dėrb joudžiausi darba, nu ir dar pėitukus mūms pačėrškėn. Ka vakari prie lauža prieš Vacluova sied kuoks tai užsienietis, senuolis suprata, gal tik po kokiuos valunduos bendravima, mat pasakuoji Rusinų naujienas nesustuodams, o graiks iš mandagoma žilam plaukou lynkčiuoji galva. Įtarimu pėlns Vacluovs pasiteirava pas muni, ar tas tik nier kuoks ispans, kap pranešiau ka graiks, anon mažni aparpalis ištėka, čiopa dvėrati ir nurūka Tarvydų kryptimi. Nelabą supratuom koki vapsva įgieli anam, bo ir nepergyvenuom, gal netor akėis unt graiku, gal dar kas, suprasi ton geriausi kolūki traktorista. Prabiega gal pusvalondis, besiedont mūms pri lauža, kap parlieki Vacluovs uždosis, su perkaitusiuom nu greiti padunguom, tieški samaguona butelka unt stala ir pradieji dusdams šaukti, ka tuoki sveti reik deramą pavaišynti. Paaiškieji, ka Vacluovs nulieki iki pat Verkiaus (kaima samaguonščika, pas katron metrėni byla, bet įgaliuotinis dalininks, tęp, ka vėskas tvarkuo) ir myguom parmyni atgal, ka galietom jau su tou graiku pabendrauti. Nikiou vargšou nebova kor dyngti, nežiūront, ka turiejuom kokybiška kalvaduosa, bova priversts gerti šūdina Verkiaus kvietrugi. Vo kap vyrą išsišnekienėji suprata, ka graikišks į sveikata "jaman" skomb kap žemaitišks "jamam", Vacluova eufuoriją nebova gala. Po keletas čierku uns pareiški, ka graiką yr mandagus, ne tęp kap tėi laukinę ispaną. Patam dar bova daug sykiu pasakyti tėi kuodinę žuodė, o dar vėliau, kažkon murmieji panuosie, ka ryt kaimi nieks nepatikies, ka ons, Vacluovs, kadaisi geriausis kolūki traktorists, gieri su mandagiu graiku.

Naktis užneši viesuoka driegmi, laužas pamažiel gesa, po onžoulu tylę pamokslava Johny Cashas, bova laiks puoilsiuo. Tik turiejuom bieda - mūsa senuolis padari ton unkščiau mūsa. Teka žadynti ir prilaikont dvėrati ir anon, vesti iki numų.

- Mandagus tėi graiką, mandagus, - murmieji Vacluovs, šleivoudams šalia dvėrati doubietami kaima kelie.

(Dar ne pabaiga)