Keliai Mašinos Žmonės

Dažniausę žmuogus gymst su dvijuom kuojuom ir dvijuom ronkuom, aišku būn ir išimčių, bet dab ne api ton. Kudie nusistovieji tuoks formats paaiškynt nier sudėtynga, kol Prometies nepradieji veltou dalynti žiebtuvieliu ZIP, ognę iskelti reikiedava dvijų ronku. Kap žmuogus prisijaukėja pėrma traspuorta priemuoni, paaiškieji, ka juoti unt Mustanga patogiausę apsižergus, nu ir reik puoras tvirtų ronku ka laikytėis už karčiu arba vadieliu. Mona kažkada turietam Mustangou būt užtekėn ir vėinuos kuojis ( bo automats), bet laužont rymta puosuki su mišelinu cypinimu, puora ronku tikrą nemaiša. Aš gimiau aštuntami dešymtmetie su bazini komplektaciji, tad tik prakotis pradiejau duomietėis ratiniem susisėikėma priemuoniem. Gan greit įvaldis triratoka galimybis perlipau unt dviratoka su priputamuom padunguom, nesliepsu papėlduomi ratuką bova prisukti, bet  anus nusijiemiau aš pats, bo turiejau priėjėma pri tieva įronkiu. Visišką nudieviejis vaikiška dviratoka, gavau dovanų rymta tyms laikams muodeli vardu "Dubysa", ton mažumeli patiunėnis, draskiau iki vėlyvuos paauglystis, kada po biški pradiejau domietėis keturatiem bėnzininiem transpuorta priemoniem. Vadelioti "Žigulius" su tieva priežiūra pradiejau gal 12 ar net biški unkščiau, bet būdams keturiuolikas, jau dronsę vuogdavau tieva valdiška "Vilioka" ir skruosdavau Telšių apylynkis, lunkydams ežerus ir upis. Nesliepsu turiedavau reikalų su miliciji, bet kadangi gan onksti pradiejau nuosava spiritiniu gierimu bizni, kas žmonių kalba skumbietu , kap samaguona virėms ir pridaviniejėms į skylis, tai ir lyšna kapeika pri savis turiedavau, katron baisę miega Telšių milicininką. Išsilaikius teisis, biedas nesibaigi, bo mon tada bova tik 17 ir gera pusmeti turiejau laukti kol anuos pradies galiuoti. Pėrma mona nuosava mašina nupėrkta su tėvų pagalba bova žigulis vaz 2103 su nerealiuom nakleikuom unt šuona "Lada Samara".

Numero uno Lada Samara

Pėrma Ladas Samaras istuoriji jau greit Noji.lt