On The Road II

don't drink and drive

Kai išmoningasis Don Kichuots iš La Mančas išsiruoši į sava legendini keliuoni, anuo krutinie degi dar nepatirtų nuotykiu liepsna, nepasakyčiau ka mes kopijavuom idalga, bet kažkas degi i pas mumis ir tas kaž kažkas vari mumis i prieki. Ja supaprastinus tus pompastiškus teiginius, tai degi vidaus degėma variklis Toyuotuo po kapuotu, o labiausę tai degi mūsu šachtas. Tik įliekus į Tenesiaus valstėji organizmas davi suprasti, ka reik melduonijaus, pirmami pasitaikiusemi prekybcintrie, dėl visišką nesuprontamu priežasčių, bova įsigyts butelis kriaušiu lykeriaus. Pirkinys bova neprasts, bo tas žvieris tęp pakieli tuonusa, ka jau ir New Orleans mūms nebebova rėba. Jau sūnku atmynti kas vairava, o kas šturmana vaidėna, bet žmuogou nagriniejunčiam žemielapi pasiruodi Kalifuornija tik per pėnkis cuomus toliaus už Lousiana. Reagouti reikieji staigę (kap būtu padaris vėins iš mona knygas heruoju Dean Moriarty), bo exits link Arkanzasa į 40 greitkeli jau bova akiratie. Sucypi padongas, girdiejuos daug garsiniu signalu (faku, katrąs garantija mumis apšieri, mūms girdieti neteka) toyuota kėrta iš trečiuos joustas link exita ir darnę įsijungi į tvarkyngu amerikienu gretas katrėi važioun iš po darba numėi ar trauk atostogauti į L.A. Tas žuodis atuostuogas mon po še dėina yr nesuprontams, bo planavėms i prieki, kada tu nežiną ar ryt tau užgėiduos gaidys, ar to jau pats Tibeta apylinkies moši sparnąs ir žadinsi žmogienus naują dėiną, neleid mon planouti jokių atuostuogu. Tai mes ir neplanavuom, tiesiog pjuoviem greitkeliu į vakarus, klausydami per radija biču su vengierkuom (1998 amerikas vidurie bova mission impossible pagauti radio stuoti ka negruotu Virgis Stakiens). Nashvile, Memphis ir Little Ruoks yr savuotišks bermuda trikampiaus atitikmou, kor prapol vėsas radija stuotis ir Virgis praded bendrauti su tavim tiesiuogę. Pas kuožna savi tikslą, Virgis bor per radija, mes pagėrdėn toyuota ir, aišku, nepamėršėn palepinti savis, traukam į vakarus link Oklahuomas city. Kažkuokiu tai muomentu įjungam autopiluota, katruo mūsa mašina netor ir nepastebimą palėiktam bermudus, kor kartu su radio stotymis pasikeit gamta su vėsu reljiefu.

Texsasa rėba kertam kap sapni, mašinuo daug tuščiuos taruos, nu alaus ir vyna pagryndi, kriaušiu likeriaus nebsinuor. Prasilenkam su meksiku trokiuku, visi trys su skrybeliem, du šuoninę palėnkėn galvas, bo neišsitenk skrybeliu kraštą, pradedam įtarinieti ka če miražas, bo mes maža geram skysčiu, nusprėndam ištuštynti da vėina sixpaka, jiegas sėlpst, sauli leidas, kertam i šuona tiesiog nu greitkeliaus į dykuma ir nešamies smėlynąs, patis nesuprasdami, kon daruom ir nuvažiavėn neaišku atstoma krentam negyvų keliautuoju mėigu, kas kabinuo kas kūzavi. Rytmetę dykumuo yr šūdiniausi, bo nier šėlta, tavi žiaurę troškėn, nes tu esi dykumuo ir tu nepameni mažiausę puoras valundų iki apapa. Ka matau draugieli per longa drybsonti kūzavi, monis visą neramėn, bo aš nežinau, ar anam dar užgėiduos gaidys Texasa dykumuo. Sukaupis dronsa lėpu iš kabynas ir žadinu kolega, o Santa Gvadelupe, sūjud, ir panašu, ka anon irgi kunkėn dykumuos troškulys kap ir muni. Aš dar tęp atsargę apžiūru anuo akis, nu ar karts grifą neiškapuoji, gi ne kuožna nakti dykumuo po atviru dongumi mėigt. Banduom suprasti, kudiel mes čė, viel prisimenam tus tris mexikus su skrybeliem, savijauta jau netuoli užraša The End, reik kažkon daryti, ar bent jau apsiprėnsti, kor link mes judam. Mon prasyded chaliuniką, matau kap lynk mūsa iš rytų velnišku greičiu atlek mašina, nesižnegnuoju, būs kas būs, ton pati vaizdini pamata ir mona kolega, o fuck mes tiesiog nulūžom gal už puoras šimtų metru nu greitkeliaus ir sauli mūms aiškę ruoda krypti kor rondąs rytą, arba kor east coast ar west coast tik ka bl(…) galva žiaurę skaust.

Šuokam viel į greitkeli, kertam į vakarus, bo kažkąp gieda būtom daba pasokti link Čikagas, tęp ir nepamačius west coast. Privažiounam kažkuoki kaimieli, maždaug Grūšlaukis dydžiaus su bėnza koloneli, gan keistą atruoda arklys pryrišts šalimąs. Kolonelis vidou pamatau kuoki tai Clint Eastwood su revuolveriu ir Stakiena skrybeli, sūvedu kinuo tas arklys lauki. Stuovu pri kasuos vėsas peršikis, muoku už bėnza ir gatorade, aiškę suprontu ka Eastwoods viskon api mumis žėna ir gal areštouti už jau ontra dėina driving under the influence. Ištrūkuom. Greičiausę mes anam per mėnkas žuvis, ons turbūt medžiuo tus tris mexikus kor mes prasilinkiem, o gal net tres mujeres, kas jau tėn daba ir bežėna. Leidam toliau į vakarus, kor žėnklą saka ka tujaus atsidorsma legendiniami 66 kelie, katrou pirmyn ir atgal laksti Keruaks su Cassady, gal net su panaši savijauta.