(Pruoveržis)

Trūmpa metra pylma apmatą

Baltijas pakrontie tvyruoji harmuonija, šėlts vėjoks maluonę kedena plaukus, o rytmetinę saulis spindulę jau bova pakvėitėn unkstyvūsius maudyniu entuziastus, apsiginklavusius ronkšloutęs ir šiaurietiška ejėma lazduomis.

Kai mūsa grožnšts galų gale pasėiki tėksla ir į dongu švystelieji išganynguoji jouda čiurkšlie, mes supratuom, ka mūsu lauk visai kituoks gyvenėms. Naus, iki šiol neragauts, su neišpasakyta prabonga tviskončiuom jachtuom, su viluom saulis nutvėikstuosi pakrontiesi ir su liūlioujunčiuom mulatiem, katruos be perstuoji nešiuo Kuba Lėbri. Mes lakstiem  pajūriu, kap futbuola faną, po sava mylimiausis komandas pergalis, prausiemies po tou smėrdončiu dušu iš po žemiu ir dainavuom "We are the champions". Rasti naftuos, pusmetri gylie yr tas pats, kas laimieti pastuovu loterijas "Auksuo Puodas" abonimenta. Vienynteli problema, ka reiks pastuovę atsijiminieti  prizini fonda, o tai gal pabuosti.

Policijis rapuorti  mes rašiem, ka mūsa sulaikėms yr visiška nesamuoni ir mes norietumem sužinuoti tikrąsis mūsa sulaikyma priežastis. Atsakėms bova standartinis - tarptautinis terorizms. Būn ta sekūndis dalis, kada tu pajauti, ka įšeję į žvyra ir paskou gyvenėms tau paaiškėn, ka tu - eilinis nevykielis.

Patarėms režisieriou: platus vaizds būtiną tor apjymti Būtingis terminala bačkas. Policijas sulaikėms nebutiną tor būti pajūrie (tai sutaupytu šėik tėik liešu, katrų ir tęp nieks neskėrs tokę nesamonę). Praeivę su šiaurietiškom lazduom galietu kalbieti slavu ir estu kalbų mišiniu, kas pakeltu tarptautini susidomiejima. Aš quite flexible, kap saka žmuonis Bolyvudi.