Tupaks Šakūrs

Tupaka žiną?

Šūds tas tava Šakūrs.

Iš rytmetiniu puokalbiu su bendradarbiu.

Gyvenėms užpelkie daug kam atruoda prilyginams ruojou, bet teisybis siorbelę pastebiesu, ka tai yr totalus mits. Prabiegusiami omžiou teka lunkytėis tuo ruojaus darba stovykluo, ir mon vėsks pasiruodi biški kitąp. Dėrbau tėn daug, o tai kažkąp nesyriš su ruojumi. Rašydams CV galiečiau pasigėrti tokiuom profesijuom kap medicinas bruolis, taksists, janituorius, picu išvežiuotuos ar tiesiog plataus pruofili vidaus apdailinyks, aš jau nešneku api profesionalu lungų valytuoji. Gera pusmeti teka padirbieti Air Duct Cleaning company, kor mona padiejiejęs darbavuos Beavis and Butt-Head, vėins balts, kėts jouds. Tas kur jouds bova visišką aiškus, jokių paslapčių, gyvena nu čekiaus iki čekiaus ir fantazava kap uns vėina dėina pradies stūmdyta narkuota ir pasėiks kažkokių neregietu aukštumų. Mėntą anuo nepakėrs, bo uns vartys rymtas šaibas, bet po neiborhuda važinies parudijusiu Ševiu, tik aparatūra kėita susidies ka Tupacs normalę skumbietu. Tėisa, teisis, tou muomentu uns bova pragieris, tudiel visi anuo planą bova daruomi kažkada į ateiti. Tas kur balts, bova irgi gan paprasts bičas, teisis bova pragieris trijuosi valstijuosi, plius dar unt anuo kybuoji byla už haliucogeniniu grybu platinima, Minesuotuo beruods, nu ir nakvuoti anam reikiedava kaliūzie, tou metu. Prijymdams muni į darba kompanijas vaduovs manau aiškę suprata ka mona green card katron tujaus gausu yr mits, bet tou muomentu galiuojontis teisis bova gan nebluogs masals. Pats buosas mon pasiruodi gan intelektualus bičas, bo uns elementariami puokalbie paminieji keleta poetu ir pasipasakuoji ka studentavima laikąs, univiera bėndriki garsa kolonelie augėna žuoli. Anuo žmuona su totalę prarukytu balsu ir užtinusęs paakęs vistėik trauki i paslaptynga bytniku kartuos muoteri.

Mona darbs bova rytmeti davažiouti iki uofisa, persiedus į fyrmas busika važiouti link joudžiu kvartala, pasijymti tuos pačiuos spalvuos bendrakeleivi, tada važiuoti į netuoli esonti kaliejima ir pasijymti baltuoji biča, atlėkus tas kasdienis procedūras galiedavuom pradieti judieti link objektu, katrėi dažniausę būdava už valunduos ar dvijų kelia. Ka kels nepraėlgtu mona bendradarbę žaisdava žaidėma”Fuckabul-Duebul”, tėisa pasakius aš nelabą įkirtau tuo žaidėma esmi, bo vėsas buobas katruos mumis aplėnkdava, ar mes anas aplėnkdavuom atitėkdava tas dvė kateguorijas, o kadangi aš nebuvau aktyvus tami žaidimi tai buvau nuleists iki gieju ir mona įsikišėma tėn nebreikieji, anėi žaisdava dvijou iki išprotiejima arba kol nedaveždavau iki uobjekta.

Tas anų žaidėms keliuonie tai bova kap ir puoilsis, labiausę nervuoji, ka abodu bandi primesti didelęs Čikagas žinuovąs, bo baltasis bičas arba Beavas bova apsilonkis “Panteras “ konci katras pagal anon bova kažkor cėntri ir tudiel uns gan gerą gaudies tuo miesta geografijuo, o joudasis tai yr Butt-Head su brazeręs neaišku prieš kėik metu vari stuffa užsipėrkti pas dyleri ir kažkudiel turieji nuojauta ka če uns jau y bovis. Žuodž aš važiuodavau pagal žemielapi o mona bendrakeleivę fakindavuos ir stebiedavuos kor tas europinis giejus anus vež.

Kai atvykdavuom į uobjekta, tai su šeiminynki dažniausę eidava kalbieti mona pakeleivę, bo anų anglu kalbuos žėnias stiprę lėnki mona murmenima. Joudis paręjis pri busika kor aš jau kraudavau amuniciji, paklausdava monis ar aš mačiau kap ta blondėni šeiminynki, katra dažną būdava lėnki babysiteri, nuorietuom anuo jouda Dikiaus. Kadandi tai bova pasidaris kasdienis klausėms aš patvėrtindavau ton hipuotezi ir abodu laimyngi eidavuom darboutėis. Keisčiause ka joudis darboudavuos kap vondens i borna prisisiemis, jokių puokalbiu su nama šeiminyke, net ja ana kažkuo paklausdava, atsakiniedava ka ruods dar nebūtu vergija panaikynta. Nu bet grįžtont prisiklausydavuom istuoriju, kap jau uns būtom suskuorėnis su ta blondini ja mes šūdžę nebūtumem tėn maišęsysi.

Mes buvuom gan draugiška komanda, tik bova problemeli, grįžtont po darbų dažniausę jau būdava tomsę ir todiel anų žaidėms prarasdava prasmi, bo gretimuo mašinuo galieji siediet bičas ir tas žuodis fuckabul galieji skumbieti keistą. Žuodž pagrindinis užsijėmėms bova radijas. Čė jau aš ruodžiau dontis, kadangi mona baltajam pakeleiviou bova kap ir pri dūšis mona pasirynkat alternatyvaus ruoka radija stuotis, tai mes gan stiprę boikotavuom joudžiaus stuoti kor ons vis tikiedavuos mumis supažyndynti su legendiniu Tupaku Šakūru, katruo radijas net negruoji. Galieji būti ka aš būčiau rimčiau susisiejis su bendradarbęs ir mes būtumem kartu pradiejien švęsti šeimuos švėntis, gal net būčiau pamiegis anų žaidėma,bet visagalis padari tęp ka aš irgi pragieriau teisis ir mona pažyntis su Beavis and Butt-Head baigies, bet ne su repu.

Muzika, vėinuoki ar kituoki muni lyd nu luopšiaus musiet, tik bieda ka per sava dorna galva aš karts sumastydavau ka vėins ar kėts stilius yr šūds, daba jau daug vondens nubiega fekalinęs vomzdęs ir aš pripažystu vėsus stilius, net rašydams tas eilutis aš klausau Tupaca. Galiečiau net atsiprašyti sava tūpa bendradarbiaus, bo buvau neteisus Šakūra pavadėnis šūdu.

Tam reikieji laika, šindėin aš pėrma syki pabandžiau reperiaus dounas, galiu pasakyti ka pastatyti nama yr papraščiau, nei scenuo prieš publika prarepouti kelis puosmelius.

Jou Jou.